News@Shocking...
Chhatrapati Sambhaji Nagar Crime : गेल्या काही दिवसांपासून गुन्हेगारी आणि खुनाच्या मन हेलावून टाकणाऱ्या घटनांच्या पार्श्वभूमीवर आता छत्रपती संभाजीनगरच्या सिल्लोड तालुक्यातून काळीज पिळवटून टाकणारी घटना समोर आली आहे.सिल्लोड तालुक्यातील मुगलपुरा परिसरात राहणाऱ्या एका जोडप्याने दत्तक घेतलेल्या एका 4 वर्षांच्या चिमुकल्या मुलीची निर्घृणपणे हत्या केली आहे.काही दिवसांपूर्वी या जोडप्याने मुलीला दत्तक घेतले होते.त्यांनीच या चिमुरडीला अक्षरश: हालहाल करुन संपवले.या घटनेमुळे सिल्लोड तालुक्यात एकच खळबळ उडाली आहे.आयत फईम शेख,असे हत्या झालेल्या मुलीचे नाव असून सदर प्रकरणी फईम आणि फौजिया फईम शेख,या जोडप्याला पोलिसांनी अटक केली आहे.
सुत्रांनी दिलेल्या माहितीनुसार,फईम आणि फौजिया, यांनी 6 महिन्यांपूर्वीच 5 हजार रुपये देऊन आयत,याला जालन्यातून विकत घेतले होते.मात्र,तिला घरी आणल्या नंतर या दोघांनी आयतवर मोठ्या प्रमाणात अत्याचार केले. अवघ्या 4 वर्षांच्या या चिमुकलीला गेल्या 15 दिवसांपासून उपाशी ठेवले.दोघेही आयतला बेदम मारहाण करत होते. चिमुरडीच्या अंगावर अनेक ठिकाणी जळत्या लाकडाने चटके दिले.तसेच चिमुरडीचे हात आणि पाय पिरगळून तोडले,तळहात आणि पायाच्या तळव्याच्या जॉईंटमधून तिची हाडे पिरगळून तोडली,तिच्या डोक्यात आणि पाठीवर जोरजोरात मारून तिला गंभीर जखमी केले.या अमानुष मारहाणीमुळे चिमुरडी आयत व्हिवळत होती.गोंडस दिसणाऱ्या आयतचा चेहरा अक्षरश: काळवंडला होता.
अशाप्रकारच्या मारहाणीमुळे अखेर 26 मार्च बुधवार रोजी रात्री आयत शेख,या चिमुकलीने प्राण सोडले.याचा पत्ता कोणालाही लागू नये,यासाठी फईम आणि फौजियाने परस्पर तिचे अंत्यसंस्कार करण्यासाठी मृतदेह सिल्लोड येथील एका कब्रिस्तानात नेला.याठिकाणी ते परस्पर आयतचा दफनविधी करुन पुरावे नष्ट करण्याचा त्यांचा प्रयत्न होता.मात्र,आजुबाजूच्या लोकांना हा सगळा प्रकार लक्षात आला.आणि त्यांनी सिल्लोड पोलिसांना याची माहिती दिली.घटनेची गंभीरता लक्षात घेत पोलिसांनी कब्रिस्तानात जाऊन दफनविधी रोखली.दरम्यान पोलिसांनी आयतचा मृतदेह ताब्यात घेऊन शवविच्छेदनासाठी सिल्लोड उपजिल्हा रुग्णालयात पाठवला.तेव्हा या चिमुरडीला अक्षरशः हालहाल करुन मारण्यात आल्याची खळबळजनक बाब उघड झाली.सदर प्रकरणी सिल्लोड शहर पोलिसांनी फौजिया आणि फईम शेख,या पती-पत्नीला अटक करून त्यांच्याविरुद्ध खुनाचा गुन्हा दाखल केला.पुढील तपास सुरू आहे.
दरम्यान,पोलिसांनी मोठ्या पोलीस बंदोबस्तात आरोपींना न्यायालयात हजर केले.पोलीस ठाणे ते सिल्लोड न्यायालयासमोर नागरिकांनी मोठी गर्दी केली होती.आरोपींना आमच्या ताब्यात द्या. त्यांना आम्ही शिक्षा देतो,अशी संतप्त मागणी नागरिकांनी केली.न्यायालयाने निर्दयी पती-पत्नी यांना 2 दिवसांची पोलीस कोठडी सुनावल्याची माहिती आहे.
#Chhatrapati Sambhaji Nagar Shocking news...
----------//----------